ឥណ្ឌូណេស៊ី៖ ក្រសួងដឹកជញ្ជូននៃប្រទេសឥណ្ឌូណេស៊ីបានឱ្យដឹងនៅថ្ងៃសៅរ៍ ទី៩ ម្សិលមិញនេះថា ខ្លួននឹងបើកការស៊ើបអង្កេតទៅលើក្រុមហ៊ុនអាកាសចរណ៍ Batik Air ដែលជាក្រុមហ៊ុនអាកាសចរណ៍ក្នុងស្រុកមួយ បន្ទាប់ពីមានហេតុការណ៍ដែលគេដឹងថា មានអាកាសយានិកពីរនាក់បានដេកលក់ក្នុងអំឡុងពេលបំពេញការងារហោះហើររបស់ខ្លួននាពេលថ្មីៗនេះ។

បើតាមរបាយការណ៍បឋមរបស់គណៈកម្មាធិការសុវត្ថិភាពដឹកជញ្ជូនជាតិ (KNKT) បានបញ្ជាក់ថា អ្នកបើកយន្តហោះ (ពីឡុត) និងសហសេវិកម្នាក់បានដេកលង់លក់ដំណាលគ្នា អំឡុងយន្តហោះកំពុងហោះហើរអស់រយៈពេលប្រមាណជា ២៨នាទី អំឡុងជើងហោះហើររបស់យន្តហោះចេញពីកោះ Sulawesi ឆ្ពោះទៅកាន់រដ្ឋធានីចាកាតា (Jakarta) កាលពីថ្ងៃទី២៥ ខែមករាកន្លងទៅ។ 

យ៉ាងណាមិញ ហេតុការណ៍ដែលបានកើតឡើងរហូតនាំឱ្យមានការស៊ើបអង្កេតនេះ ពុំបានបណ្ដាលឱ្យប៉ះពាល់ដល់អ្នកដំណើរ ឬបុគ្គលិកបម្រើការលើយន្តហោះនោះឡើយ ដោយតាមប្រភពព័ត៌មានបានអះអាងថា យន្តហោះក្នុងហេតុការណ៍នោះគឺជាប្រភេទយន្តហោះ Airbus A320 ដែលផ្ទុកអ្នកដំណើរចំនួន ១៥៣នាក់ និងបុគ្គលិកបម្រើការលើយន្តហោះចំនួន ៤នាក់ និងមានថេរវេលាហោះហើរប្រហែល ២ម៉ោង ៣៥នាទី។ 

អគ្គនាយកនៃស្ថាប័នទទួលបន្ទុកផ្នែកដឹកជញ្ជូនផ្លូវអាកាសលោក M. Kristi Endah Murni បានថ្លែងថា ក្រសួងដឹកជញ្ជូនសូមធ្វើការថ្កោលទោសយ៉ាងខ្លាំងទៅលើក្រុមហ៊ុនអាកាសចរណ៍ Batik Airជុំវិញឧបទ្ទវហេតុនេះ ដោយអំពាវនាវឱ្យក្រុមហ៊ុនអាកាសចរណ៍យកចិត្តទុកដាក់បន្ថែមទៀតចំពោះពេលវេលាសម្រាករបស់បុគ្គលិកអាកាសចរណ៍របស់ខ្លួន។

ផ្អែកតាមរបាយការណ៍មួយបានឱ្យដឹងថា អ្នកបើកយន្តហោះម្នាក់មិនបានសម្រាកគ្រប់គ្រាន់ឡើយនៅយប់មុនការហោះហើរនេះ។ ក្រោយការហោះហើរឡើងបានប្រហែលកន្លះម៉ោង លោកបានស្នើសុំការអនុញ្ញាតដើម្បីសម្រាកបន្តិច ដោយទុកភារកិច្ចឱ្យជំនួយការទី២ របស់លោក ប៉ុន្តែចៃដន្យអ្នកបើកយន្តហោះម្នាក់ទៀតដែលទទួលបន្ទុកក៏បានដេកលក់ដូចគ្នាដោយអចេតនា។ យ៉ាងណាក្ដី អ្នកបើកយន្តហោះទាំងពីរនាក់នោះពុំត្រូវបានគេបញ្ចេញអត្តសញ្ញាណឡើយ ដោយគេគ្រាន់តែដឹងថា អ្នកបើកយន្តហោះទាំងពីរនាក់គឺជាជនជាតិឥណ្ឌូណេស៊ីផ្ទាល់ដោយម្នាក់មានអាយុ៣២ឆ្នាំ និងម្នាក់ទៀតមានអាយុ ២៨ឆ្នាំ៕